معايرة ألوان شاشة الكمبيوتر: إمتى تحتاجها وإزاي بتتعمل صح

الرندر طالع ممتاز على شاشتك، وبعد ما تبعته العميل يرد: «الألوان باهتة»، أو «الخشب طالع أحمر». أو تطبع البوستر فيطلع أغمق من اللي كنت شايفه.
المشكلة في الحالات دي غالبًا مش في شغلك. المشكلة إن الشاشة اللي بتاخد عليها قرارات الألوان مش معروضة صح.

في الصفحة دي هنشرح يعني إيه معايرة ألوان الشاشة، وإمتى تحتاجها، والفرق بين الطرق المختلفة، وإزاي بنعملها في ExactShade.

جهاز معايرة احترافي على شاشة كمبيوتر أثناء قياس الألوان

يعني إيه معايرة ألوان الشاشة؟

معايرة الشاشة (Monitor Calibration) هي ضبط ألوان الشاشة وسطوعها والتباين بتاعها بالقياس، مش بالعين، عشان اللي بتشوفه يبقى أقرب ما يمكن للحقيقة.

بتتعمل بجهاز قياس بيتحط على الشاشة ويقرا الألوان اللي بتعرضها فعلًا. بعدها بيتعمل للشاشة ملف ألوان مخصوص (ICC Profile)، وده الملف اللي الكمبيوتر بيستخدمه عشان يعرض الألوان مظبوطة على الشاشة دي بالذات.

الملف ده بيتعمل لشاشتك هي، مش لموديل الشاشة عمومًا. عشان كده ملف جاهز من النت مش بيحل المشكلة، حتى لو لنفس الموديل.

علامات إن شاشتك محتاجة معايرة

  • العميل بيشوف ألوان غير اللي عندك، أو الموبايل بيعرض التصميم بشكل مختلف عن الكمبيوتر.
  • شاشتين جنب بعض في نفس المكتب بيعرضوا نفس الصورة بلونين مختلفين.
  • الأبيض مش أبيض: مايل للأزرق أو الأصفر أو البنفسجي.
  • الطباعة بتطلع أغمق أو ألوانها مختلفة عن الشاشة.
  • الشاشة جديدة وبتشتغل بإعدادات المصنع. إعدادات المصنع مش دايمًا مناسبة لشغل الألوان، وأداء الشاشة بيتغير مع الوقت.
نفس الشاشة قبل المعايرة (لون بنفسجي ظاهر) وبعد المعايرة (ألوان محايدة)
نفس الشاشة ونفس الكادر: على الشمال قبل المعايرة، وعلى اليمين بعدها.

3 طرق للمعايرة: إمتى تنفع كل واحدة؟

1. الضبط من الويندوز أو الماك بالعين

الويندوز والماك فيهم أداة بتساعدك تظبط السطوع والألوان بالنظر. الطريقة دي مجانية وسريعة، وأحسن من مفيش.
بس ليها حدود واضحة: عينك بتتأقلم مع الإضاءة اللي حواليك، فاللي تشوفه «مظبوط» النهارده ممكن يكون مايل من غير ما تاخد بالك. ومفيش أي قياس يثبت النتيجة.

2. إنك تشتري جهاز معايرة وتعملها بنفسك

اختيار كويس لو عندك شاشة واحدة، ووقت تتعلم، وناوي تعيد المعايرة بنفسك كل فترة.
بس الجهاز أداة، والنتيجة بتتوقف على حاجات تانية: نوع اللوحة (Panel)، والإعدادات المستهدفة المناسبة لشغلك، وإضاءة المكان، والخبرة في إن تعرف إمتى المشكلة في الشاشة نفسها ومش هتتحل بالمعايرة.

وخد بالك من حاجة مهمة في الحساب: جهاز المعايرة زيه زي أي جهاز قياس، دقته بتقل مع الوقت، والشاشات الجديدة (زي OLED والشاشات واسعة الألوان) أحيانًا بتحتاج أجهزة أحدث عشان تتقاس صح. يعني لو هتستخدمه مرة أو مرتين في السنة، هتدفع تمن جهاز كامل عشان استخدام قليل، وبعد فترة هتحتاج تغيّره بجهاز تاني. وده بيخلي تكلفته عليك عالية جدًا، على عكس التعامل مع جهة متخصصة. في ExactShade بنحدّث أجهزتنا باستمرار عشان نواكب أنواع الشاشات الجديدة.

3. خدمة معايرة احترافية في مكانك

الأنسب لما يكون عندك أكتر من شاشة أو فريق كامل، أو شغلك بيتسلّم لعملاء والألوان فيه مهمة، أو شاشتك غالية وعايز تطلّع منها أحسن أداء ممكن من غير ما تقعد تتعلم.
الميزة الأكبر إن المعايرة بتحصل في نفس المكان والإضاءة اللي بتشتغل فيها كل يوم.

إزاي بنعمل المعايرة في ExactShade؟

بنيجي لحد المكتب أو الاستوديو في القاهرة والجيزة، والشاشة الواحدة بتاخد حوالي 20 لـ 30 دقيقة.

  1. فحص الشاشة وتوزيع الإضاءة: بنقيس الإضاءة في 9 نقط على الشاشة، عشان نعرف هل منوّرة بالتساوي ولا فيه مناطق أغمق من غيرها.
  2. اختيار جهاز القياس المناسب: بنختار جهاز القياس الاحترافي حسب نوع اللوحة وطبيعة شغلك.
  3. القياس والضبط: بنقيس 118 لون ونظبط إعدادات الشاشة الأساسية.
  4. ملف ألوان مخصوص: بنعمل ICC Profile لشاشتك ونفعّله.
  5. التقرير: كل عميل بياخد تقرير مفصّل. ولو محتاج أرقام الدقة (ΔE)، بنوفرها لك مجانًا لو طلبتها.
رسم توضيحي: الشاشة متقسمة 9 مناطق، وبنقيس السطوع في كل منطقة
قياس توزيع الإضاءة على 9 نقط في الشاشة باستخدام جهاز قياس الإضاءة
نتيجة قياس الألوان على الشاشة: 118 لون اتقاسوا كلهم
نتيجة حقيقية من زيارة: الـ 118 لون اتقاسوا كلهم.
أدوات الزيارة: جهاز المعايرة وجهاز قياس الإضاءة وشهادة المعايرة قدام الشاشة
شهادة المعايرة من ExactShade وبيتكتب فيها قراءات الشاشة

بنعاير شاشات الكمبيوتر واللابتوب والـ iMac وكل أجهزة Apple وشاشات الويندوز. الموبايلات لأ.

مش كل شاشة بتوصل لنفس النتيجة

المعايرة بتطلّع أحسن أداء ممكن من شاشتك، لكنها مش بتحوّل شاشة عادية لشاشة احترافية.
لو لقينا مشكلة في اللوحة نفسها، زي إضاءة مش متساوية بشكل كبير، بنقولك قبل ما نبدأ، لأن ساعتها المعايرة مش هتوصل للنتيجة المطلوبة.

نتيجة فحص توزيع الإضاءة بالنسب لكل منطقة في الشاشة

كل قد إيه أعيد المعايرة؟

أول معايرة هي اللي بيبان فيها أكبر فرق، لأنها بتظبط الشاشة من الأول. ومع الاستخدام العادي، دقة الألوان بتتحرك شوية بشوية.
عشان كده المعايرة الدورية مهمة، خصوصًا لو شغلك معتمد على الألوان. للشركات والاستوديوهات فيه Team Plan فيها زيارتين في السنة.

الأسعار باختصار

الزيارة مجانية من 6 شاشات. ولـ 10 شاشات، سعر الشاشة 550 جنيه للمرة الواحدة، أو 480 جنيه في Team Plan.
السعر بيتحسب حسب عدد الشاشات، وتقدر تحسب عرضك بنفسك على صفحة الأسعار.

عملاءنا قالوا إيه

تقييمنا على جوجل 4.9 من 5 من 18 تقييم. ودي شوية منهم بكلام أصحابها:

«تجربة ممتازة والألوان بقت أفضل وفرقت في شغلي جدا.»

محمد عماد (تقييم جوجل)

«في حد كان جالي وقعد خمس ساعات وقالي مش هينفع يتعمل كالبريشن… ولما كلمتهم طمنوني وفعلا الموضوع ماخدش أكتر من نص ساعة… كان في مشكلة عندي في كابل الشاشة الأصلي وأنا مكنتش أعرف، بس هما عرفوا وحلّوا الموضوع.»

ضياء ر. (تقييم جوجل)

«الشاشة عندي نطقت والألوان اتغيرت جذريا.»

رامز س. (تقييم جوجل)

«شغلهم جميل، ودي رابع مرة أتعامل معاهم.»

محمد عطا (تقييم جوجل)

«حصل فرق في ألوان الشاشة بعد المعايرة، أرشحهم جدا لأي حد حابب يظبط ألوان شاشته.»

أحمد ع. (تقييم جوجل)

اتظبط معانا أكتر من 1000 شاشة لحد دلوقتي.

أسئلة شائعة

أقدر أنزّل ICC Profile جاهز من النت؟

تقدر، بس مش هيديك النتيجة اللي محتاجها. كل شاشة مختلفة حتى لو نفس الموديل، والملف الجاهز مش معمول لشاشتك.

المعايرة ممكن تبوّظ الشاشة أو تقلل جودتها؟

لأ، بالعكس. الهدف إن الألوان تبقى أدق وأثبت، من غير أي ضرر للشاشة.

بتيجوا لحد المكتب؟

أيوه، بنيجي لمكانك في القاهرة والجيزة، عشان المعايرة تحصل في نفس الإضاءة اللي بتشتغل فيها.

فيه ضمان؟

أيوه، كل معايرة عليها ضمان شهر.

الخدمة تنفع لفريلانسر ولا للشركات بس؟

تنفع للاتنين، من شاشة واحدة لحد استوديو كامل.

مش متأكد شاشتك محتاجة معايرة؟

كلمنا وهنساعدك تعرف إذا كانت المعايرة هتفرق معاك، وإيه الأنسب لعدد شاشاتك.

احجز استشارة مجانية
  
كلمنا واتساب

اقرا كمان: الأسئلة الشائعة · خدمة معايرة الشاشات

Scroll to Top